Шрифт
Каноны Триоди Постной
Трипеснец во Вторник Первой седмицы
Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.
Сла́ва Тебе́, Бо́же наш, сла́ва Тебе́.
Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.
Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй, трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Го́споди, поми́луй, 12,
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
Псалом 50:
Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.
Кано́н трипе́снец. Творе́ние господи́на Ио́сифа, гла́с 2.
Пе́снь 2
Ирмо́с: Ви́дите, ви́дите, я́ко Аз есмь в мо́ри спасы́й, и в пусты́ни насы́тивый израи́льтеския лю́ди, и во́ду из ка́мене источи́вый челове́ком, да дре́вле во тлю па́дшаго поне́с, привлеку́ ко Мне за неизрече́нную ми́лость.
Припев: Поми́луй мя, Бо́же, поми́луй мя.
Трезви́ся, бо́дрствуй, воздохни́, прослези́ся, посто́м все бре́мя греха́, душе́, отве́ргни, те́плым покая́нием отбе́гни огня́, и пла́чем страсте́й плаче́вную ри́зу раздери́, оде́жду Боже́ственную прие́млющи.
Припев: Поми́луй мя, Бо́же, поми́луй мя.
К горе́ присту́пим изря́дных дея́ний поще́нием вси, долуре́вностныя оста́вльше сласте́й прило́ги: и в сомра́к вше́дше честны́х виде́ний, еди́ну у́зрим Христо́ву рачи́тельную добро́ту, обожа́еми та́йно Боже́ственными восхожде́нии.
Припев: Поми́луй мя, Бо́же, поми́луй мя.
Увы́ мне, кто бу́ду? что соде́ю, грех соде́ловая, и Влады́ки не устраша́яся безсо́вестный? сего́ ра́ди пре́жде суда́ осужде́н есмь: Правосу́де Благи́й, обрати́в мя спаси́, па́че всех челове́к Тебе́ преогорчи́вшаго.
Припев: Пресвята́я Богоро́дице, спаси́ на́с.
Богоро́дичен: Неора́нная Земле́, прорасти́вшая всех Пита́теля, отверза́ющаго ру́ку, и благоволе́нием Свои́м насыща́юща вся́кое живо́тное кре́постию Боже́ственною: утверди́ хле́бом жи́зненным ослабе́вшая сердца́ сы́тостию лю́тых на́ших прегреше́ний.
Припев: Поми́луй мя, Бо́же, поми́луй мя.
Прииди́те, сни́дем в клеть душе́вную, Го́сподеви моли́твы воздаю́ще, и вопию́ще: О́тче наш, И́же на небесе́х, до́лги на́ша осла́би и оста́ви, я́ко еди́н Благоутро́бен.
Припев: Поми́луй мя, Бо́же, поми́луй мя.
Души́ на́шея в посте́ ти́хое показу́юще, не се́туим вожделе́нных дней измене́ния, я́ко просия́ша нам благоче́стия исправле́ния.
Припев: Поми́луй мя, Бо́же, поми́луй мя.
Кто о́гнь угаси́? кто затче́ уста́ звере́й? По́ст, о́троки из пе́щи избавле́й, и проро́ка Дании́ла от львов сне́ди: его́же лобыза́им и мы, бра́тие.
Сла́ва, тро́ичен: Безнача́льная, Несозда́нная, Триипоста́сная Еди́нице, Госпоже́, Ца́рство веко́в, Тебе́ сла́вит, Отца́ и Сы́на и Свята́го Ду́ха, мно́жество А́нгел и все естество́ челове́ческое.
И ныне. Богоро́дичен: Тебе́, вседоброде́тельную сла́ву ро́да на́шего пое́м, Тобо́ю бо обожи́хомся, Де́во: ибо родила́ еси́ нам Спа́са и Бо́га Христа́, разреши́вшаго нас от кля́твы.
Пе́снь 8
Ирмо́с: Творца́ тва́ри, Его́же ужаса́ются А́нгели, по́йте, лю́дие, и превозноси́те во вся ве́ки.
Припев: Поми́луй мя, Бо́же, поми́луй мя.
Сон отложи́, душе́, лю́тыя ле́ности, и усе́рдно бо́дрствуй к Боже́ственным за́поведем: приближа́ется Жени́х, свещено́сец потщи́ся Того предусре́сти.
Припев: Поми́луй мя, Бо́же, поми́луй мя.
Уя́звлена лю́те сласте́й ору́жием, лечбо́ю щедро́т благоутро́бнаго Твоего́ манове́ния исцели́ мя, Сло́ве, я́ко да Тя благода́рно сла́влю во ве́ки.
Припев: Поми́луй мя, Бо́же, поми́луй мя.
От страсте́й вредных, от за́висти и ненависти, от вся́кия зло́бы воздержи́ся, душе́, пи́щами пита́ющися, пи́щу го́рнюю невеще́ственно ходата́йствующими.
Припев: Пресвята́я Богоро́дице, спаси́ на́с.
Богоро́дичен: Богороди́тельнице Чи́стая, души́ моея́ гное́ния, и се́рдца стра́сти, и ума́ премене́ние исцели́, я́ко еди́на гре́шных Помо́щница и разоря́емых Стена́.
Припев: Поми́луй мя, Бо́же, поми́луй мя.
Воздержа́нием вси ду́ши впери́вше, на небеса́ моли́твы благоприя́тныя принесем Го́сподеви.
Припев: Поми́луй мя, Бо́же, поми́луй мя.
Дух умиле́ния прие́мше, прослези́м ко избавле́нию душ, песносло́вяще Христа́ во ве́ки.
Припев: Поми́луй мя, Бо́же, поми́луй мя.
Пи́щу бога́таго оплева́вше, прииди́те с Ла́зарем пости́мся, да и нас огре́ет Авраа́мово не́дро.
Слава. Тро́ичен: Тро́ице Единосу́щная и Еди́нице Несозда́нная и всех Бо́же, Тебе́ превозно́сим во вся ве́ки.
И ныне. Богоро́дичен: Моли́тву сотвори́ о пою́щих Тя, Пречи́стая, изба́витися вся́ческих искуше́ний и бед.
Пе́снь 9
Ирмо́с: Иса́ие лику́й, Де́ва име́ во чре́ве, и роди́ Сы́на Емману́ила, Бо́га же и челове́ка, Восто́к и́мя Ему́, Его́же велича́юще, Де́ву ублажа́ем.
Припев: Поми́луй мя, Бо́же, поми́луй мя.
Земноро́дных кто та́ко поползну́вся, Бо́га прогне́ва когда́? кто стремле́ньми зло́бы после́дова и пребыва́лище яви́ся греха́, я́коже аз, окая́нный? но Бо́же воли́телю ми́лости, Ты мя уще́дри.
Припев: Поми́луй мя, Бо́же, поми́луй мя.
Богови́дных А́нгел си́лы, благоуве́тливаго Бо́га умоли́те спасти́ ду́шу, в пучи́не жите́йских сласте́й, и треволне́ниих страсте́й обурева́емую, и в прило́зех сопроти́вных духо́в бе́дствующую.
Припев: Поми́луй мя, Бо́же, поми́луй мя.
Гряди́, душе́, кри́лы облегча́ема, посто́м доброде́телей от долувлеку́щия зло́бы воста́ни, и виде́ньми наслади́ся светле́йшими, пи́щу хода́тайствующими доброде́телей, богови́дна быва́ющи ве́рою.
Припев: Пресвята́я Богоро́дице, спаси́ на́с.
Богоро́дичен: Кто слы́шаны сотвори́т хвалы́, Тебе́ ро́ждшия па́че ума́, хвали́маго Влады́ку, Чи́стая, и Го́спода, Его́же хвалят а́нгельская чинонача́лия; Того́ у́бо моли́ о лю́дех согреши́вших, Де́во Неискусобра́чная.
Припев: Поми́луй мя, Бо́же, поми́луй мя.
Вре́мя благоприя́тное, день спасе́ний, принесе́м Бо́гу да́ры доброде́телей, в не́мже отложи́вше дела́ тьмы, бра́тие, облеце́мся во ору́жие све́та, якоже Па́вел вопие́т.
Припев: Поми́луй мя, Бо́же, поми́луй мя.
Прииди́те, я́коже Госпо́дь посто́м уби́ врага́, сим и мы сокруши́м его стре́лы и ловле́ния: за мя иди, сатано́, ки́йждо глаго́люще, внегда́ хо́щет искуша́ти нас.
Припев: Поми́луй мя, Бо́же, поми́луй мя.
Посто́м приложи́вшеся к моли́тв горе́, и мы се́рдцем чи́стым ви́дим Бо́га, скрижа́ли прие́млюще за́поведей внутрь, я́коже Моисе́й, сла́вою облиста́ющеся, лице́м любве́ Его.
Сла́ва, тро́ичен: Единосу́щием воспева́ю Тя, Безнача́льная Тро́ице Честна́я Живонача́льная, Несеко́мая Еди́нице, О́тче нерожде́нне, и рожде́нне Сло́ве и Сы́не, и Ду́ше Святы́й, спаси́ ны, пою́щия Тя.
И ныне, Богоро́дичен: Па́че ума́ рождество́ Твое́, Богома́ти, без му́жа бо зача́тие в Тебе́, и деви́чески рожде́ние бысть, и́бо Бог есть роди́выйся: Его́же велича́юще, Тя, Де́во, ублажа́ем.
Го́споди и Влады́ко живота́ моего́, дух пра́здности, уны́ния, любонача́лия, и праздносло́вия не даждь ми. (Поклон земной.)
Дух же целому́дрия, смиренному́дрия, терпе́ния, и любве́, да́руй ми рабу́ Твоему́. (Поклон земной.)
Ей, Го́споди Царю́, да́руй ми зре́ти моя́ прегреше́ния, и не осужда́ти бра́та моего́, я́ко благослове́н еси́ во ве́ки веко́в, ами́нь. (Поклон земной.)
Таже малых 12, глаголюще на кийждо поклон: Бо́же, очи́сти мя гре́шнаго.
И паки последи молитву всю:
Го́споди и Влады́ко живота́ моего́, дух пра́здности, уны́ния, любонача́лия, и праздносло́вия не даждь ми. Дух же целому́дрия, смиренному́дрия, терпе́ния, и любве́, да́руй ми рабу́ Твоему́. Ей, Го́споди Царю́, да́руй ми зре́ти моя́ прегреше́ния, и не осужда́ти бра́та моего́, я́ко благослове́н еси́ во ве́ки веко́в, ами́нь. (И поклон един великий.)
Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.
Таже: Сла́ва, и ны́не: Го́споди, поми́луй, трижды.
И отпуст.
Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших и всех святы́х, помилуй и спаси́ мя, гре́шнаго. Аминь.
